بقلم / خالد الترامسي مجلس الوزراء يعلن عن رفع أسعار الكهرباء والمياه بنسبة ٣٠% أول يوليو القادم وإحداث حالة من التقشف علي المستوي الحكومي ، طيب ده هيكلفك سيادة معالي رئيس الوزراء شراء أطنان من الجلسرين لمعالجة أثار التقشف ، يا تري عامل حسابها وأدرجتها في الموازنة أم ستترك الناس تقشف وبعد كدة الموضوع يتفاقم ويجيلهم جزام والمجتمع يقع في حيص بيص . طيب ما بدل تطبيق سياسات التقشف دي متنعنش الناس القهرانة شوية ، لا مش بمعطر جو ، لا يا سيدي أنا أقصد بالإنعاش تفوكها عليهم شوية وأهو يمكن يدعولك شوية ينفعوك في القرافة وربنا ينورهالك بأنوار الدعاء بدل مينورهالك بحاجة تانية .
يعني علي سبيل المثال أنسوا موضوع الأجيال القادمة وبحبحوها شوية مش عندنا بترول وغاز طبيعي ، زودوا الإكتشافات شوية دا ثلاثة أو أربعة أبيار ، بس إضغط بس علي العباقرة فناني نظرية الجردل والخروف واحكم قبضتك عليهم أصلهم مافيا وهتلاقي الشعب الغلبان ده قَلَبْ علي خليجي ، بس من غير عقال الحمد لله إحنا مش بنقلد بنعرف نحافظ علي هويتنا كويس ، يلي يا باشا بشبشها علي الناس ربنا يبشبشهالك ، هو متبشبش ، يعني مش محتاج بشبشة ، مش فارقة معاه طيب يبقي التقشف .
وأنا أول واحد هيتقشف طيب الواحد يشتري كام لتر جلسرين قبل ما يغلي ، وهربي دقني كمان ووفر أمواس حلاقة بس متخليش حد يقبض علي وهلبس قميص واحد ومش هغسله ألا كل أسبوعين ومش هستحمي ألا مرة واحدة كل سنة وإن كان علي الوضوء الحمد لله فيه رخصة ” التيمم ” وكدة أكون حليت لك مشكلة وزارة من الوزارات اللي عندك إللي ضربه حيص بيص ومش قادرة علي كسب جولة من جولات المفاوضات في سد النهضة .
بس أهم حاجة معالي رئيس الوزراء قبل معمل الحاجات دي يا ريت أنتوا أَوِلْ ناس تتقشف مش أنتوا قادتنا ونسير علي دربكم ، يبقي لازم السادة الوزراء وأقاربهم وأولهم معاليك تتقشفوا بدون تحقق هذا الشرط أنا مش هتقشف وبسحب كلامي .
عموما معاليك الناس مش ناقصة ، كل حاجة زادت في البلد نتيجة قرارات غير مَدْروسَة وتجريب ووضع الناس في الخلاط ، يعني كفاية كدة ، طيب هقولك علي حل تاني سيبك من الكام بير بترول وغاز ، فروق الدعم بتاع الغاز الطبيعي بتاع مصانع الحديد هما يخدوا دعم ليه ، الفروق دي نمنعها عن مصانع الحديد وكمان نسكت الأخ بتاع السراميك اللي عاوز يخفض ثمن الغاز الطبيعي لمصانعه أسوة بمصانع الحديد ونسد الباب ده علي الناس الطماعة التانية ، ونقوم بتوزيع المليارات الناتجة عن هذه الفروق علي الناس الغلابة .
أظن بفتحلك أهه في أبواب لدعاء الناس لك و هتخليك بطل قومي وتكبر في عيون الغلابة بس أوعي بعدها تحلي في عينك وتفكر في إعتلاء أماكن أخري ههههههه دي ملهاش ألا أسد واحد حاكم عرينه كويس ، يا ريت تشتغلوا معاه بما يرضي الله ، مصر هتبقي أحسن بلد في العالم .
وبعدين يا باشا هو لازم تصرح وتعلن وتقول تقشف ومتقشفش وزيادة في أسعار الكهرباء مترفع الأسعار كُتيمي هي الناس حاسه بحاجة ، الناس يا كبير مصطوله والله لو زودت الأسعار ١٠٠ % مش ٣٠% والله مش هيحسوا بحاجة ، أنا مش عارف إيه ، تيجي أقولك حاجة في ودنك بس متقولش لحد ، الناس معاها فلوس طول ما هما مبيشتكوش إرفع الأسعار بس من غير تصريحات ولا يحزنون ، الناس اللي شغاله معاك دي يا معالي الباشا شكلهم كدة بيورطوك ، طيب لاحظ إن الموضوع ده بيسيئ للريس ومينفعش التصريحات دي ومش وقتها علي الإطلاق .
